مجتمع لغى قدر الله وماشاء فعل وقال اهلا بالخرافة والجهل
مجتمع معقد في حياته يابى ان يسير طريق الحق والهداية ويصر على طريق الجهل والظلالة والبدع ماجربش ليه الاول طريق الحق واول ماقلبه نادى نادى عالسراب والسواد ولم يفرق الموضوع بين عالم او جاهل طبيب او تمرجي فقير او غني
مصر بان يلقب بابو جهل تفهمه وتوعيه يقولك انا عاوز حل سريع
واصبحت اي مشكلة اي هموم نفسية او اجتماعية حلها بالنسبالهم المندل والكف والدجل والسحروالجن بقوا متصورين ان الجن بايده الصلاح بايده ينقذهم من اللي اصابهم ولغوا قدرة ربنا وارادته اللي فاقت كل شيء
كل يوم نسمع عن دجال جديد كان عامل زباين من الشرق للغرب كل يوم نسمع عن حوادث الاحتيال ومافيش فايدة يطلع غيره برضه ويستولي على العقول والقلوب الضعيفة اللي فقدت ارادتها وسيطرتها على الامور المشكلة موش في الدجال نفسه لا المشكلة في الزباين اللي بيزيدوا ومهما يحصل ويتقبض على الناس دول مافيش فايدة
وياااااااااااه على الزباين اللي كلهم تقريبا ستات
ام عنايات رايحة تدور على حل لعنايات اللي عنست وموش لاقية عريس وام فتحي اللي رايحة عشان فتحي ابنها سابها وطفش وموش راضي يرجع تحت سيطرتها وحكمها وام دنجل اللي ابنها علاطول بيسقط كل سنة
وكله كوم وام غل وام نار وساسة كوم ست كدة تلاقيها التوكيل الرسمي للغل والحقد والغيرة والكره رايحه لساعدة الدجال عشان عاوزة تاذي في مخاليق ربنا اللي مغلولة منهم وتربط جارها وتعمل عمل لجارتها ولقرايبها اللي دايما فارسينها وكايدينها لانهم بينجحوا في حياتهم وهيا الخيبة لاحقاها ولاحقها المحاريس ولادها
وام مافيش امل اللي محرمة من الانجاب ولجات للدكاترة وماحصلش النصيب وماجاش الفرج ورايحه يمكن الدجال يديلها الوصفة الجهنمية اللي حاتضرب كل الاسباب العلمية وتخليها تخلف بدل الواحد عشرة
واللي حاتموت من الغيرةىوالشك على جوزها ونفسها تجند كتيبة كاملة من الجن والعفاريت يراقبوا جوزها ويجيبولها خط سيره بالكامل من غير ماينقص كارت شحن
وده لانهم كلهم عجزوا عن حل مشكلاتهم بالعقل والمنطق واعتمد على العصا السحرية التي لاوجود لها على ارض االواقع طب الناس دي ماسالتش نفسها مجرد سؤال ان ليه الدجال ده اللي قادر يجيبلهم فلوش ويرزقهم زي مابيطلبوا منه ليه بيشتغل وياخد منهم بالملايين هوا موش قادر يجيب لنفسه اضعافهم بالدجل والسحر
طب وماسالوش نفسهم ليه حياته كلها مشاكل وهموم وموش قادر يحلها ويساعد نفسه فين المنطق فين اصحاب العلم والشهادات اللي لجئوا لحلول عواقبها وخيمة وغير معلومة وحاتزيد الطين بلة
وشوشة الودع والولية تقوله خد وشوشها ولما يسمع الكلام تروح ماسكاها وتقوله ياعين امك ده انتا مهموم هم مالوش اول من اخر اهلك باعوك وللشارع رموك وهوا يستعجب ويقولها اه صح صح واعيني على اللي حب ولا طال وحبيبه ماهواش داريان وعلى وشه هيمان وياسلام ده ايه ده الولية عرفت كل حاجة من الودع ازاي ظ لا انا لازم اقول لاصحابي كلهم ييجوا يسمعوا خيبتهم ووكستهم المفضوحين
ولا قراءة الكف واللي يقولك خط الحياة عامل قافلة مع خط العمر وخط الحب يالهوي قصير جدا وبيبص لخط الوفاة
وقراية الفنجان والست تقولك ايه ؟ يادهوتي مين اللي واقف جنب الحيطة وقاعد ينهق ويبحلق يالهوي يالهوي ايه اللي جايب البت بهانة بنتي في الفنجان اه يامقصوف الرقبة انتا بتستغفلني وتكلمها يا مخفي الاسم ياللي واقف تنهق زي حمار في يوم شغل قطعوه من الضرب وايه يا ولة ده اللي مشروخ الناحية التانية ده ناس كتير ماشيين مدلدلين وبالسواد موشحين وبالصويت شغالين وجتتك الميتة شايلين
والكوتشينة والولية القرشانة بتقلبها وتقولك ايه ده شايب وعايب وعامللي فيها نايب وحبيب
والحظ الصيني والاولياء والابراج
للاسف طبقة عريضة من المجتمع بتعلق مشكلاتها على غير الواقع ودي حالة نفسية من الاحباط والفشل والعجز عن تحمل المسؤلية والصبر في حل المشكلة بطريقة منطقية
وناس تانية ممكن تاخد الموضوع بالهزار على سبيل التجربة موش لحاجة معينة وده برضه غلط هذا الزعم باطل بدليل ان الرسول صلى الله عليه وسلم قال من اتى عرافا فصدقه بما يقول لم تقبل له صلاة أربعين يوما) ويرى ان من يقرا حظك اليوم للمزاح او العبث لا تقبل له صلاة لمدة اربعين يوما فكيف اذا كان يحدث هذا الامر يوميا
حتى القنوات الفضائية بهدف الربح والمكسب ظلت تهتم بالسحر والشعذة وتتناول هذه الامور كانها دعاية وحالات تقولك ايوة انا خفيت على ايد عمنا الدجال واللي تقول الحياة حلوةولذيذة مع شيخنا الدجال
ويبقى الهزل مستمرا
الرئيسية 
أحدث الصور 
الأحد سبتمبر 13, 2009 6:49 am
